MANILA — Inaasahan ang maulap na kalangitan, kalat-kalat na pag-ulan at thunderstorms sa ilang bahagi ng Luzon, Visayas at Mindanao ngayong Lunes, Nobyembre 23, dahil sa shear line, Intertropical Convergence Zone (ITCZ) at iba pang weather system, ayon sa Philippine Atmospheric, Geophysical and Astronomical Services Administration (PAGASA).

Sa weather forecast na inilabas alas-4 ng madaling-araw, sinabi ng PAGASA na makaaapekto ang shear line sa silangang bahagi ng Northern at Central Luzon, habang mararanasan naman sa natitirang bahagi ng Northern Luzon ang epekto ng Northeast Monsoon o amihan.

Asahan ang maulap na kalangitan na may kalat-kalat na pag-ulan at isolated thunderstorms sa mainland Cagayan, Isabela, Nueva Vizcaya, Quirino at Aurora dahil sa shear line. Posible ang pagbaha at pagguho ng lupa sa mga lugar na ito bunsod ng katamtaman hanggang malakas na pag-ulan.

Samantala, magdadala ang ITCZ ng maulap na kalangitan, kalat-kalat na pag-ulan at thunderstorms sa Eastern Visayas, Northern Mindanao, Caraga, Davao Region, SOCCSKSARGEN, Lanao del Sur, Maguindanao del Norte at Maguindanao del Sur. Posible rin ang pagbaha at landslide dahil sa katamtaman hanggang paminsan-minsang malakas na pag-ulan.

Inaasahan naman ang maulap na kalangitan na may mahinang pag-ulan sa Batanes at Babuyan Islands dahil sa amihan. Bahagyang maulap hanggang maulap na kalangitan na may isolated light rains ang mararanasan sa Ilocos Region at Cordillera Administrative Region.

Sa natitirang bahagi ng Visayas at Mindanao, posible ang mga panaka-nakang pag-ulan o thunderstorms dahil sa ITCZ. Samantala, makararanas ang Metro Manila at iba pang bahagi ng bansa ng kaparehong kondisyon dahil sa easterlies.

Nagbabala ang PAGASA na posibleng magkaroon ng pagbaha at pagguho ng lupa sa mga lugar na makararanas ng matitinding thunderstorms.

Para naman sa kondisyon ng hangin at karagatan, katamtaman hanggang malakas na hanging hilagang-silangan ang iiral sa Northern Luzon, na may taas ng alon na 1.5 hanggang 3.7 metro.

Mahina hanggang katamtamang hanging mula hilagang-silangan hanggang hilagang-kanluran ang iiral sa Mindanao, habang easterly hanggang northeasterly winds naman ang mararanasan sa natitirang bahagi ng bansa. Inaasahang nasa 0.6 hanggang 2.5 metro ang taas ng mga alon sa dalawang lugar.

Sa Metro Manila, sisikat ang araw alas-6:01 ng umaga at lulubog alas-5:24 ng hapon. Inaasahan namang sisikat ang buwan alas-4:02 ng hapon at lulubog alas-4:16 ng madaling-araw, na may 98 porsiyentong illumination.

Leave a Reply

Trending